ئەندامێكی ئەنجومەنی نوێنەرانی عێراق رایدەگەیەنێت، هەرێم سێ داواكارییەكەی بەغداد جێبەجێبكات كێشەی مووچە چارەسەردەبێت و دەشڵێت، “بڕیارە رۆژی یەكشەممەی داهاتوو دووبارە هەرێم و بەغداد كۆبوونەوەیەك ئەنجامبدەن و بڕیاری یەكلاكەرەوە لەبارەی مووچە و بودجەوە بدرێت”.
غەریب ئەحمەد، ئەندامی ئەنجومەنی نوێنەرانی عێراق لە لێدوانێكدا بە تۆڕی میدیایی ئێستای راگەیاند، بەغداد پێشتر سێ داواكاریی هەبووە كە رادەستكردنی داهات، ئامادەكردنی لیستەكان بە بایۆمەتری، لەگەڵ ناردنی تەرازووی پێداچوونەوە”میزان المراجعە”ی هەرێم بۆ بەغداد بووە كە ئەگەر هەرێم جێبەجێیبكات كێشەی مووچە چارەسەردەبێت و وەزیری دارایی عێراق رەزامەندی لەسەر ناردنی مووچە دەدات.
وتیشی، “هەفتەی رابردوو كۆبوونەوەیەك لە نێوان وەفدی هەرێم و بەغداد ئەنجامدرا و بڕیاردرا لیژنەیەك بەپەلە سەردانی هەولێر بكات و رۆژی یەكشەممەی داهاتوو هەرێم و بەغداد كۆبوونەوەیەكی یەكلاكەرەوە لەبارەی مووچە و بودجە ئەنجامبدەن و دوا بڕیار بدرێت”.
