فەرماندەی گشتیی هێزەكانی سوریای دیموكرات رایدەگەیەنێت، پێشوازی لە قسەكانی گیێر پیدەرسن، نێردەی تایبەتی نەتەوە یەكگرتووەكان دەكەین كە ئامانج لێی سەركەوتنی قۆناغی راگوزەری سیاسیی سوریایە و دەشڵێت، “تێكەڵكردنی هێزەكانمان پێویستی بە میكانیزمێكی باش هەیە”.
مەزڵوم عەبدی فەرماندەی گشتیی هێزەكانی سوریای دیموكرات، پەیامێكی لە ئێكس بڵاوكردەوە و دەڵێت، “دۆسیەی باكوور و رۆژهەڵاتی سوریا و تێكەڵكردنی هێزەكانیان لەگەڵ پەیكەری دەوڵەتی سوریا پێویستی بە میكانیزمێكی باش هەیە كە رێگا بۆ تێروانینێكی نیشتمانیی گشتگیر خۆشبكات.
هەر لە پەیامەكەیدا هاتووە، “پێویستمان بە حكومەتێكە كە نوێنەرایەتیی هەمووان بكات و دەستوورێكی دادپەروەرانەی هەبێت كە مافەكان دەستەبەربكات و دادپەروەری و یەكسانی بەدیبهێنێت”.
جێی ئاماژە بۆ كردنە، پێشتر گیێر پیدەرسن نێردەی تایبەتی نەتەوە یەكگرتووەكان داوایكردبوو، دەرفەت بدرێتە ئەحمەد شەرع و هەسەدە لەسەر میكانیزمی پێكەوەكاركردنیان رێكبكەون.
