لە گەرمیان روونکردنەوە دەربارەی نۆژەنکردنەوەی مزگەوتی بازاڕی رزگاری دەدرێت و سەرپەرشتیاری ئیدارەی گەرمیانیش دەڵێت، “لەهەمان شوێنی خۆی بە کوالێتییەکی بەرز نۆژەندەکرێتەوە”.
جەلال شێخ نوری سەرپەرشتیاری ئیدارەی گەرمیان رایگەیاند، مزگەوتی بازاڕی رزگاری بە کوالێتییەکی باشتر و نەخشەیەکی نوێ لە هەمان شوێنی ئێستای دەخرێتەوە خزمەت هاوڵاتییان.
دەشڵێت، رێگەنادەین پرۆسەی نۆژەندکردنەوەی مزگەوتە هیچ گرفت و ئاستەنگییەکی بۆ دروستبکرێت و پشتگیری بەڕێوەچوونی کارەکانی دەکەین، چونکە مزگەوتەکە مێژوویەکی گرنگی لە ناوچەکەدا هەیە و خزمەتی هاوڵاتییان و مسوڵمانان کردووە.
هاوکات، لەماوەی رابردوودا دەنگۆیەک دەربارەی شوێنی مزگەوتەکە هەبووە کە بکرێتە پڕۆژەی بازرگانی و مزگەوتەکەش بۆ شوێنێکی دیکە بگوازرێتەوە، هەربۆیە هاوڵاتییان و کاسبکاران ناڕەزایەتییان دەربڕیوە، ئەمرۆش بەرپرسانی گەرمیان پاڵپشتی خۆیان بۆ پڕۆسەی نۆژەندکردنەوەکە له هەمان شوێنی ئێستا دووپاتدەکەنەوە.
