وەزارەتی دارایی عێراق رایدەگەیەنێت، بۆ ناردنی مووچەی فەرمانبەران دەبێت حكومەتی هەرێمی كوردستان داهاتی نەوتی و نانەوتی رادەستبكەن و پەلەش بكەن لە تەوتینكردنی مووچە.
بەپێی راگەیەندراوێكی وەزارەتی دارایی عێراق تێیدا هاتووە، ئەمڕۆ پێنجشەممە، تەیف سامی وەزیری دارایی عێراق پێشوازی لە وەفدێكی مامۆستایانی پارێزگای سلێمانی كردووە و لە كۆبوونەوەكەدا تەئكید لە بڕیاری دادگای فیدراڵیی عێراق كراوەتەوە بۆ تەوتینكردنی مووچەی مووچەخۆران و رادەستكردنی داهاتی نەوتی و نانەوتی.
لە راگەیەندراوەكەدا هاتووە، لە كۆبوونەوەكەدا هەردوولا كێشە هەڵپەسێردراوەكانی سێكتەری پەروەردەیان تاوتوێكردووە لەگەڵ گرتنەبەری جێبەجێكردنی رێوشوێنەكانی یاسای بودجە.
