وەزارەتی خوێندنی باڵا بڵاویکردەوە، گرفتی سەدان خوێندکاری ماستەر و دکتۆرا چارەسەرکرا کە وانەبێژبوون و کراونەتە گرێبەست.
لە راگەیەندراوەکەدا هاتووە، گرفتى سەدان خوێندکارى خوێندنى باڵا/ ماستەر، دکتۆرا چارەسەرکرا، کە وەک گرێبەست فەرمانى دامەزراندنیان بۆ دەرچووە و پێشتر وانەبێژبوون.
ئاماژە بەوەشکرا، سەرۆکایەتى ئەنجومەنى وەزیران رەزامەندىدا لەسەر ئەوەى ئەوانەی کە بە گرێبەست دامەزراون وەک وانەبێژ و لە ئێستادا قوتابى و خوێندکارى خوێندنى باڵان ماستەر یاخود دکتۆرا، مافیان پارێزراو دەبێت و لە خوێندن بەردەوام دەبن تاکو تەواوکردنى قۆناغى خوێندنەکەیان.
هاوکات، ئاماژە بەوەشکراوە، دواى تەواوکردنى خوێندنەکەیان رێکارەکانى بە گرێبەستکردن و دەستبەکاربوونیان بۆ ئەنجامدەدرێت بەو مەرجەى بەکردارەکى وانەبێژبووبن و مەرجەکانى دامەزراندیان بە گرێبەست تێدابێت، واتە لە یەک کاتدا هەردوو مافى خوێندن و دامەزراندنیان پارێزراو دەبێت.
