بڕیارە ئەمڕۆ گەڕی سێیەمی گفتوگۆکانی نێوان ئێران و سێ وڵاتی ئەوروپی دەستپێبکات.
ئاژانسی هەواڵی میهر، بڵاویکردەوە ئەمڕۆ دووشەممە جنێفی پایتەختی سویسرا میوانداریی خولی سێیەمی وتووێژەکانی نێوان ئێران و سێ وڵاتی ئەوروپایی دەکات کە وڵاتانی (بەریتانیا، فەرەنسا و ئاڵمانیا)ن، بە بەشداریی جێگری بەرپرسی سیاسەتی دەرەوەی یەکێتیی ئەوروپا.
خولی یەکەمی دانوستانەکان لە مانگی ئۆکتۆبەری ساڵی رابردوودا لە پەراوێزی 79هەمین دانیشتنی کۆمەڵەی گشتیی نەتەوە یەکگرتووەکان لە نیویۆرک بەڕێوەچوو و خولی دووەمیش لە 29ی تشرینی دووەمی ساڵی رابردوو لە جنێف بەڕێوەچوو.
ئیسماعیل بەقائی، وتەبێژی وەزارەتی دەرەوەی ئێران لە کۆنگرە رۆژنامەوانییە هەفتانەییەکەیدا رایگەیاند، دانوستانەکان کۆمەڵێک بابەت دەگرێتەوە لەوانە پرسە ناوچەییەکان، پەیوەندییە دوو قۆڵییەکان لەگەڵ یەکێتیی ئەوروپا و پرسی ئەتۆمی.
