محەمەد شیاع سودانی، سەرۆکوەزیرانی عێراق دەستپێشخەرییەکی بۆ بەرەوپێشبردنی وەبەرهێنانی عێراق رایگەیاند و دەڵێت “لە ئەمساڵدا بەغداد دەکەین بە پایتەختی گەشتیاریی لە رۆژهەڵاتی ناوەراستدا”.
محەمەد شیاع سودانی سەرۆکوەزیرانی عێراق، لە ئەنجامی کۆبوونەوەیەکی لەگەڵ ژمارەیەک بەرپرسی وەبەرهێنان و پیشەسازیی عێراقدا رایگەیاند، هاوڵاتییان دڵنیادەکەینەوە کە جدین لەسەر ئەنجامدانی پڕۆژەی وەبەرهێنان و گەشتیاریی لە عێراقدا و ئامانجمان ئەوەیە بەغداد بکەینە پایتەختی گەشتیاریی لە رۆژهەڵاتی ناوەڕاستدا.
ئاماژەی بەوەشداوە “پێکهاتەکانی بەرەوپێشبردنی عێراق سەرجەمییان بەردەستن، تەنها هەوڵدان و پلانی جدی دەوێت تا زنجیرەیەک پڕۆژەی گرنگی وەبەرهێنان لە وڵاتەکەدا ئەنجامبدرێن و سەرنجی گەشتیاران و خەڵکی رابکێشن”.
هاوکات، لە درێژەی کۆبوونەوەکەدا پێداچوونەوە بە 21 پڕۆژەی گەشتیارییدا کراوە و بڕیاردراوە لە ماوەیەی دیاریکراوی خۆیاندا کارەکانیان بە تەواوەتی جێبەجێبکرێن، کە بریتین لە: “هۆتێل، چێشتخانە، دارستانی دەستکرد، هاوینەهەوار و پڕۆژەی جۆراوجۆری دیکە.
