دۆناڵد ترەمپ سەرۆکی هەڵبژێردراوی ئەمریکا لەبارەی ئەگەری رادەستنەکردنەوەی دیلەکانی ئیسرائیل تا کاتی دەستبەکاربوونی هەڕەشەی توند لە بزووتنەوەی حەماس دەکات.
دۆناڵد ترەمپ رایگەیاند، “ئەگەر تا وادەی دەستبەکاربوونم، دیلە ئیسرائیلییەکان رادەستنەکرێنەوە، دەرگای دۆزەخ بە روویاندا دەکەینەوە”.
ئەمە یەکەمجار نییە دۆناڵد ترەمپ لەبارەی دیلەکانەوە هەڕەشەدەکات و لە چەند رۆژی رابردووشدا جەختیکردبووەوە ئەگەر تا دەستبەکاربوونی ئازادنەکرێن، کێشەیەکی گەورە لە رۆژهەڵاتی ناوەڕاست روودەدەن.
بڕیارە لە 20 ی ئەم مانگە دۆناڵد ترەمپ وەک سەرۆکی نوێی ئەمریکا بچێتە کۆشکی سپی و دەستبەکاربێت.
لەلایەکی دیکەشەوە گفتوگۆکانی لیژنەی دانوستانکاری ئیسرائیل و حەماس لە دۆحە بەردەوامیان هەیە، حەماس رازیبووە بە رادەستکردنەوەی دیلەکان، بەڵام ئیسرائیل بەڵێنی ئاگربەستی نەداوە.
