رۆژی 4ی کانوونی دووەمی هەموو ساڵێک بە رۆژی جیهانیی زمانی برایل لەلایەن نەتەوە یەکگرتووەکانەوە دیاریکراوە.
ئامانج لە دیاریکردنی ئەم رۆژە، هاندانێکە بۆ کەسانی نابینیا کە لە هەوڵەکانیان بۆ خوێندن و فێربوون بەردەوامبن.
لە ساڵی 2019ەوە رۆژی جیهانیی زمانی برایل بۆ هۆشیارکردنەوەی خەڵک لە گرنگیی زمانی برایل وەک ئامرازێکی پەیوەندیکردن لە بەدیهێنانی مافەکانی مرۆڤی نابینا و کەمبینا بەڕێوەدەچێت.
زمانی برایل چییە؟
بریتییە لە نمایشکردنی هێما ئەلفوبێ و ژمارەییەکان بە بەکارهێنانی شەش خاڵ بە دوو ریزی ستوونی کە هەر یەک لە ریزەکان سێ خاڵ لەخۆدەگرێت، و سیستمەکە لە وڵاتێک بۆ وڵاتێکی دیکە جیاوازی هەیە، نابینا و کەمبینا برایل بەکاردەهێنن.
زمانی برایل بە ناوی داهێنەرەکەیەوە ناونراوە کە لەلایەن داهێنەری سەدەی نۆزدەهەم لویس برایل-ەوە ناونراوە، داهینەرێکی فەرەنسی بووە و ساڵانی (1809-1852)، ژیاوە.
زمانی برایل، وەک لە ماددەی دووەمی رێککەوتننامەی مافی خاوەن پێداویستیی تایبەتدا هاتووە ئامرازێکی پەیوەندییە بۆ نابینایان لە چوارچێوەی (پەروەردە، ئازادی رادەربڕین و بیروڕا و دەستڕاگەیشتن بە زانیاری و نووسراوەکان) وەک لە ماددەکانی 21 و 24ی رێککەوتننامەکەدا هاتووە.
بەپێی نەتەوە یەکگرتووەکان، خاوەن پێداویستییە تایبەتەکان کە ژمارەیان نزیکەی یەک ملیار کەسە لە سەرانسەری جیهاندا، ئەو گروپە کۆمەڵایەتییەن کە کەمترین دەستڕاگەیشتنیان بە چاودێریی تەندروستی، خوێندن، دامەزراندن و بەشداریکردنی کۆمەڵگە هەیە.
هەروەها خاوەن پێداویستییە تایبەتەکان ئەگەری ئەوەیان زیاترە کە هەژار ببن و بەدەست رێژەی بەرزی توندوتیژی و پشتگوێخستن و خراپ بەکارهێنانەوە دەناڵێنن، هەروەها لە ریزی پەراوێزخراوترین گروپەکانن لە هەر کۆمەڵگەیەکدا کە بەهۆی هەر قەیرانێکەوە بناڵێنێت، بەپێی ئەوەی نەتەوە یەکگرتووەکان ئاماژەی پێکردووە.
