وەزارەتی دارایی هەرێم رایدەگەیەنێت، ئاوات شێخ جەناب وەزیری دارایی هەرێم لەگەڵ وەفدێكی تەكنیكی وەزارەتی دارایی عێراق كۆبووەوە و ئاماژە بۆ ئەوەش كراوە، وەفدەكە كاردەكەن بۆ ئەوەی لەو ماوەیەی بۆیان دیاریكراوە كارەكان بەسەركەوتوویی تەواو بكەن.
بەپێی راگەیەندراوێكی وەزارەتی دارایی هەرێم كە وێنەیەكی دەست تۆڕی میدیایی ئێستا كەوتووە و تێیدا هاتووە، ڕۆژی سێشەممە ئاوات شێخ جەناب وەزیری دارایی و ئابوریی هەرێم پێشوازیكرد لە وەفدێكی تەكنیكیی وەزارەتی دارایی عێراق كە ماوەی دوو رۆژە بەسەردانێكی رەسمی لە هەرێمی كوردستانن.
هەر لە راگەیەندراوەكەدا هاتووە، وەزیری دارایی پشتیوانیی خۆی و وەزارەتی بۆ سەرخستنی كارەكانیان دووپاتكردەوە و رایگەیاند، “لەپێناو چارەسەركردنی سەرجەم كێشە تەكنیكییەكانی تایبەت بە مووچە و جێبەجێكردنی داواكارییە نوێیەكانی وەزارەتی دارایی عێراق لەسەر رێكخستنەوەی راپۆرتەكانی تەرازووی پێداچوونەوەی مانگانە، بەڕێوبەرایەتیی گشتی ژمێركاری و گەنجینەكان و سەرجەم یەكە ژمێریاریەكان ڕاسپێردراون لە ماوەی كەمتر لە هەفتەیەكدا سەرجەم كارەكان تەواوبكەن.
ئاماژە بۆ ئەوەش كراوە، تیمی تەكنیكيی وەزارەتی دارایی عێراق سوپاسی پشتیوانییەكانی وەزیری داراییان كرد و رایانگەیاند، وەك یەك تیم لەگەڵ بەڕێوبەرایەتیی گشتی ژمێركاری لە وەزارەتی دارایی كاردەكەن بۆ ئەوەی لەو ماوەی بۆیان دیاریكراوە كارەكان بەسەركەوتوویی تەواوبكەن.
