سەرۆکی سوریا سوپای وڵاتەکەی بەجێهێشت و هەڵات.
میدیا عەرەبییەکان بڵاویان کردەوە، بەشار ئەسەد، سەرۆکی سوریا سوپای وڵاتەکەی بەجێهێشتووە و هەڵاتووە.
چەند سەرچاوەیەک باس لەوەدەکەن بەشار ئەسەد بەرەو ئێران رۆیشتووە، بەڵام نازاندرێت مەبەستی سەردانەکە کۆبونەوەیە لەگەڵ بەرپرسانی وڵاتەکە، یان دورکەوتنەوەیە لە مەترسییەکانی سوریا.
گرژی و ئاڵۆزیەکانی سوریا قۆناغێکی دیکەی تێپەڕاند، دوای ئەوەی نۆ رۆژە، پێکدادان و شەڕی بەردەوام لەنێوان سوپای سوریا و گروپە چەکدارەکان بوونی هەیە، سوپای وڵاتەکە لە چەندین شار و گوند پاشەکشێی کردووە و گروپە چەکدارەکانیش دوای کۆنتڕۆڵکردنی شارەکانی حەڵەب و حەمما، لەپێشڕەویی زیاتردان.
وڵاتانی ناوچەکەش بەتایبەت عێراق، ئوردن، لوبنان و ئێران، خۆیان بۆ پێشهاتە ناوخۆییەکانی سوریا ئامادەدەکەن، وەک ئامادەکارییەکیش ئوردن و لوبنان بۆ کەمکردنەوەی مەترسییەکانی جەنگەکە، سنوورەکانیان لەگەڵ سوریا داخست.
پێشوتریش عێراق سنوورەکانی لەگەڵ وڵاتەکەدا داخست و هێزی سەرسنووری خستە حاڵەتی ئامادەباشییەوە، ئێرانیش، ئاماژەی بەوەداوە ئامادەی هەموو جۆرە پاڵپشتییەکە بۆ وڵاتەکە.
