وەزارەتی بەرگریی تورکیا ئەمڕۆ یەکشەممە ڕایگەیاند، لە هێرشێکدا بۆسەر کاروانێکی سەربازی وڵاتەکەیان لە ڕۆژئاوای کوردستان دوو سەربازیان کوژراون.
لە ڕاگەیەندراوێکدا وەزارەتی بەرگریی تورکیا ئاشکرایکردووە، ” لە هێرشەکەدا کە لەلایەن یەپەگەوە ئەنجامدراوە دوو سەرباز کوژراون و دوو سەربازی دیکەش بریندار بوون، لەگەڵ ئەوەش لە شوێنی ڕووداوەکە، ئۆپەراسیۆنێک ئەنجامدراوە”.
بەپێی زانیارییەکان کاروانە سەربازییەکەی سوپای تورکیا لە دەوروبەری مەنبەج کراوەتە ئامانج و تورکیا ڕاستەوخۆ یەپەگەی تۆمەتبارکردووە.
ئەگەرچی یەکینەکانی پاراستنی گەل “یەپەگە” بەشێکن لە هێزەکانی سوریای دیموکراتیک، بەڵام تورکیا هەمووکات بە یەپەگە/پەکەکە ناویان دەهێنێت.
سوپای تورکیا دەڵێت، هێرشەکە لە شوێنێکدا ئەنجامدراوە، کە لە ساڵی 2016 دا لە ئۆپەراسیۆنێکدا لە یەپەگە پاککراوەتەوە.
سوپای تورکیا لەماوە چەند ساڵی ڕابردوودا چەندین ئۆپەراسیۆنی دژی ڕۆژئاوای کوردستان ئەنجامداوە و ئێستا بەشێک لە شارەکانی ڕۆژئاوای کوردستان بە دەست سوپای تورکیا و گروپە وەفادارەکانی تورکیاوەیە.
