وەزارەتی بازرگانی عێراق دووپاتیکردەوە، ئاردی خۆماڵی هەموو جۆرە پشکنینەکانی جۆرایەتی بۆ دەکرێت و هیچ ماددەیەکی پارێزەری کیمیایی تێدا نییە کە کاریگەریی نەرێنی لەسەر جەستە بەجێبهێڵێت.
وەزارەتی بازرگانیی عێراق هەوڵدەدات، لە رێگەی میکانیزمێکەوە، ئاردی بەرهەمهێندراوی خۆماڵی بە فڕنی سەموون و نانەواخانەکان بدات لە پێناو ئەوەی بەکاریبهێنن لە کارەکانی رۆژانەیاندا.
جەختیشکراوەتەوە، وەزارەتەکە پاڵپشتیی پیشەسازییە نیشتمانییەکان دەکات و دەیەوێت بگاتە ئاستی بەدەستهێنانی خۆبژێوی لە بواری بەرهەمهێنانی ئارد، لەگەڵ پابەندبوون بە دابینکردنی بەرهەمێکی تەندروست و سەلامەت بۆ بەکاربەران.
