سەرۆكی یەكێتی هاوخەمی بۆ شەهیدبوونی پلەدارێكی پێشمەرگە و پلەدار و سەربازێكی سوپای عێراق دەردەبڕێت و دەڵێت، “ناهێڵین خوێنی رژاوی رۆڵەکانمان بەهەدەر بڕوات”.
بافڵ جەلال تاڵەبانی، سەرۆكی یەكێتیی نیشتمانیی كوردستان لە پەیامێكدا رایگەیاند، شەهیدبوونی فەرماندە عەقید روکن سامان سابیر لە هێزەکانی پێشمەرگە و عەقید محەمەد رەزا و قارەمان شەریف سەرباز لە هێزەکانی سوپای عێراق لەکاتی ئۆپراسیۆنێکی سەربازیی هاوبەشدا بۆ پاراستنی ئاسایش و سەقامگیریی کوردستان کۆستێکی گەورەیە و لە دڵەوە نیگەرانیکردین.
وتیشی، “بۆ ئەم خەمە گەورەیە پرسە و هاوخەمیی قووڵی خۆمان ئاڕاستەی کەسوکار و بنەماڵە سەربەرزەکانیان، هاوڕێ و هاوسەنگەرانیان دەکەم و هاوبەشی ئەم ماتەمە گەورەیەم”.
سەرۆكی یەكێتی دڵنیاییش بە كەسوكار و هاوسەنگەرانیان دەدات و دەڵێت، “تۆڵەی ئەم شەهیدانە لە ئەستۆی ئێمەیە و ناهێڵین خوێنی رژاوی رۆڵەکانمان بەهەدەر بڕوات”.
هەروەك هیوای زوو چاکبوونەوەش بۆ بریندارەکان دەخوازێت و ئاماژەدەدات، هیوادارم بەزووترین کات بە سەلامەتی بگەڕێنەوە ناو کەسوکارەکانیان.
کاتژمێر 9ی بەیانیی ئەمڕۆ لە سنووری خورماتوو، بۆمبێکی چێندراو بە کاروانی ئۆتۆمبێلەکانی فەرماندەی فەوجی سێی لیوای یەکی هاوبەشی پێشمەرگە و سوپای عێراق تەقییەوە و لەئەنجامدا پلەدارێكی پێشمەرگە و پلەدار و سەربازێكی سوپای عێراق شەهیدبوون و، سێ سەربازی دیكەش برینداربوون.
پێشتر وەزارەتی پێشمەرگە لە راگەیەندراوێکدا بڵاویکردەوە، رووداوەکە، لە ئەنجامی کێوماڵکردنی ناوچەیەکی بەرفراوانی ئاسایشی هاوبەش بووە.
