قائیمقامی شارەزوور رایگەیاند، کێشەی پیسبوونی ئاوی ئەو گەڕەکانەی سکچوون و رشانەوەیان تێدا بڵاوببووەوە چارەسەرکراو و دابەشکردنی ئاو دەستیپێکردووەتەوە.
رزگار غەفور قائیمقامی شارەزوور لە کۆنگرەیەکی رۆژنامەوانیدا رایگەیاند، لەدوای بڵاوبوونەوەی سکچوون و رشانەوە بەهۆی تێکەڵبوونی ئاوی خواردنەوە بە ئاوەڕۆ بە هیمەت و پاڵپشتی لایەنە پەیوەندیدارەکان توانیمان 12 شکاوی لە بۆری ئاوی گەڕەکی شارستانیی چارەسەربکەین و ئاوی بێستانسوور بگەڕێنینەوە بۆ گەڕەکەکە.
ئاشکراشیکرد، دووبارە پشکنین بۆ ئاوەکە کراوەتەوە دڵنیابووینەتەوە لە خاوێنییەکەی، لە ئەمڕۆوە دابەشکردنی ئاو دەستپێدەکاتەوە و قەرەبووی رۆژانی رابردوویان بۆ دەکرێتەوە.
