نرخی نەوت بەردەوامە لە دابەزین و شرۆڤەکاران باس لە دوو هۆکاری سەرەکی دەکەن کە لە پشت ئەو دابەزینەوەن.
ئەمڕۆ دووشەممە، نرخی نەوتی خاوی برێنت بەڕێژەی 31 سەنت کە دەکاتە 0.4% دابەزی و گەیشتە 73.56 دۆلار بۆ هەر بەرمیلێک.
هاوکات نرخی نەوتی خاوی رۆژئاوای تەکساسی ئەمریکیش گەیشتووەتە 70 دۆلار بۆ هەر بەرمیلێک، 38 سەنت کە دەکاتە 0.5% دابەزیوە.
ئەوە لەکاتێکدایە رۆژی هەینیی رابردووش نرخەکانی نەوت بەڕێژەی زیاتر لە 2% دابەزیبوون.
لەبارەی هۆکاری دابەزینی نرخەکانەوە شرۆڤەکارانی بازاڕی نەوت دەڵێن، ئەو پاکێجەی هاندان کە پەکین لە کۆبوونەوەی لیژنەی هەمیشەیی کۆنگرەی نەتەوەیی گەل لە رۆژی هەینی راگەیەندرا، لە چاو چاوەڕوانییەکانی بازاڕ کەمتربوو ئەو هاندانە ئابورییانەی چین نەیانتوانی دڵی بازرگانانی نەوت خۆشبکەن.
هەروەها هۆکارێکی دیکەی ئەو دابەزینە لە نرخی نەوت دەگەڕێتەوە بۆ ئەوەی مەترسیی پچڕانی دابینکردنی نەوت بەهۆی زریانی رافایل لە کەنداوی مەکسیک لە ئەمریکا کەمبووەوە.
