هانسی فلیك، راهێنەری یانەی بەرشەلۆنەی ئیسپانی ئاماژەی بەو سەركەوتنە كرد كە ئێوارەی چوارشەممە تیمەكەی بەرامبەر یانەی سرڤێنا زڤێزدا (ئەستێر سوورە)ی سربی 5-2 بەدەستیهێنا، لەمیانەی گەڕی چوارەمی خولی یانە پاڵەوانەكانی ئەوروپا.
فلیك دوای یارییەكە لە كۆنگرەیەكی رۆژنامەنووسیدا رایگەیاند، 100%ی ئاستمان بە درێژایی 90 خولەك پێشكەشكرد، پێزانینم هەیە بۆ ئەوەی كردمان و هەموو ئەوەی دەیكەین.
وتیشی، “بەشێوەیەكی زۆر باش لەكاتی بوونی تۆپدا یاریدەكەین، هەروەها فشار دەكەین و زۆر باشیش بەرگری دەكەین، ئەمەش ئاسان نەبوو، چونكە سرڤێنا زڤێزدا دەزانێت چۆن یاری و چۆن بەرگری دەكات، یارییەكی ناوازەمان پێشكەشكرد”.
فلیك یانەكەشی بە نایاب و ناوازە ناوبرد.
بەو بردنەوەیە یانەی بەرشەلۆنە سێیەم بردنەوەی لەسەریەكی لە خولی یانە پاڵەوانەكان تۆماركرد و بەوەش 9 خاڵی لە ریزبەندیی شەشەمدا بەدەستهێناوە. لەكاتێكدا یانە سڕبییەكە چوارەم شكستی یەك لەدوای یەكی چنییەوە و بەوەش بێ هیچ خاڵێك لە ریزبەندی سی و پێنجەم (پێش دواهەمین)دایە.
