ئۆلاف شۆلتز راوێژکاری ئەڵمانیا کریستیان لیندەر وەزیری دارایی وڵاتەکەی لە کار دوورخستەوە و وڵاتەکە کەوتە قەیرانێکی سیاسییەوە.
شەوی رابردوو ئەڵمانیا کاتێكی سەختی بەڕێکرد، ئەمەش پاش ئەوەی بەهۆی پێشکەشکردنی پرۆژەیەکەوە لەلایەن پارتی لیبڕاڵەکانەوە کێشە کەوتە ئەو حکومەتە هاوپەیمانییەی لەلایەن هەرسێ پارتی سەرەکی وڵاتەکە پارتی سۆسیال دیموکرات، پارتی لیبراڵ و پارتی سەوز.
سەرەتا ئۆلاف شۆڵتز کریستیان لێندەر وەزیری دارایی لە کارەکەی دوورخستەوە کە هاوکات سەرۆکی پارتی لیبڕاڵەکانە، و رایگەیاند، “چەندین جار ناپاکی لە کارەکەیدا کردووە”، دواتریش تەواوی وەزیرەکانی دیکەی ئەو حزبە دەستلەکارکێشانەوەی خۆیان راگەیاند.
بە کشانەوەی لیبڕاڵەکان لە حکومەت، حکومەتەکەی شۆڵتز زۆرینەی دەنگەکانی لە پەرلەمانی وڵاتەکەی لەدەستدا.
لە ئێستادا و دوای رووداوەکانی شەوی رابردوو ئەڵمانیا کەوتووەتە بەردەم دوو ئەگەرەوە، یەکەمیان شۆڵتز دووبارە متمانەی پەرلەمان بە حکومەتەکەی بەدەستبهێنێتەوە ئەگەری دووەمیان ئەوەیە ئامادەکاریی بۆ هەڵبژاردنێکی پێشوەخت بکرێت.
ئەم رووداوانە لە کاتێکدان، ئەڵمانیا بە دۆخێکی ئابووری قورسدا تێدەپەڕێت، هەڵبژاردنەوەی دۆناڵد ترەمپ وەک سەرۆکی ئەمریکا دڵەڕاوکێکانی زیاتر کردووە.
