ژمارەی دەنگدەری هەڵبژاردنی سەرۆکایەتیی ئەمریکا لە هەڵکشاندایە.
ئاژانسی ئەسۆشیەیتد پرێس بڵاویکردەوە، ژمارەی ئەو کەسانەی کە لە سەرەتای هەڵبژاردنەکانی ئەمڕۆی ئەمریکا دەنگیان داوە نیوەی کۆی گشتی دەنگدەرانی هەڵبژاردنەکانی ساڵی 2020ی تێپەڕاندووە.
تائێستا زیاتر لە 82 ملیۆن کەس لە رێگەی دەنگدانی پێشوەختەوە دەنگیانداوە، و بە گەرموگوڕترین هەڵبژاردن لە مێژووی ئەمریکادا وەسفدەکرێت.
هەڵبژاردنی سەرۆکایەتی لە ویلایەتە یەکگرتووەکانی ئەمریکا دەستیپێکردووە و ئەمریکییەکان بۆ هەڵبژاردنی سەرۆکی داهاتوویان دەنگ بە کاندیدان دۆناڵد ترەمپ و کاملا هێرس دەدەن.
وێستگەکانی دەنگدان لە ڤێرمۆنت و نیو هامپشایەر کاتژمێر 6ی بەیانیی ئەمڕۆ بە کاتی ئەمریکا و 2ی پاشنیوەڕۆ بە کاتی هەرێمی کوردستان کراونەتەوە.
ئەم هەڵبژاردنە هەڵبژاردنی ئەندامانی ئەنجومەنی نوێنەران و یەک لەسەر سێی کورسییەکانی ئەنجومەنی پیرانیش لەخۆدەگرێت لە کۆتایی رۆژدا دەست بە ژماردنەوەی دەنگەکان دەکرێت بۆ دیاریکردنی براوە، بەڵام رەنگە ئەنجامە رەسمییەکان کاتی زۆریان بوێت بەهۆی ئەوەی ژمارەی دەنگدەر زیادیکردووە.
