پۆلیسی ئەڵمانیا چەند بەشێكی فڕۆكەخانەی فرانكفۆرت-ی داخست بەهۆی گومانكردن لە جانتایەكی كەلوپەلی جێهێڵدراو.
میدیاكان بڵاویانكردەوە بینای ژمارە (1)ی فڕۆكەخانەكە و وێستگەی میترۆی هەرێمایەتیی پەیوەندیدار پێوەی چۆڵكراوە، پاش ئەنجامدانی ڕێوشوێنێك لەلایەن پۆلیسی فڕۆكەخانە بە بەشداریی پۆلیسی ویلایەت و پۆلیسی فیدڕاڵی.
پۆلیسی فڕۆكەخانە لە تویتەر بڵاویكردەوە، لێكۆڵینەوە لە جانتایەكی كەلوپەلی جێهێڵدراو كراوە و دواتر دەركەوتووە بێ كێشەیە.
ڕۆژنامەی (فڕانكفۆرتەر ئەلجماینە تسایتونگ) بڵاویكردەوە، دەسەڵاتداران دوو كەسی گومانلێكراویان دەستگیركردووە و لە زاری سەرچاوەكانی پۆلیسیشەوە ئاشكرایكرد كە دوو كەسەكە لەنێو توندڕەوانی شارەكەدان.
ڕۆژنامەكە ڕوونیشیكردەوە، دوو كەسەكە جانتاكەیان خستووە بەر لەوەی دروشمی “ئەڵڵاهو ئەكبەر” بڵێنەوە.
