قوباد تاڵەبانی، رایدەگەیەنێت، ” هەڵبژاردنی ئەمجارە جیاوازە و پارتی ناتوانێت ساختەکاری تیادا بکات”.
قوباد تاڵەبانی، لێپرسراوی مەكتەبی سكرتارییەتی سەرۆك مام جەلال، لە وتارێکدا کە لە گۆپتەپە پێشکەشیکرد رایگەیاند، لە رابردوودا خەڵک پێیوابوو هەڵبژاردن گۆڕانکاری دروستناکات و پارتی ساختەکاری خۆی هەر دەکات و مردووەکانیان دەنگی خۆیان دەدەن و ئاوارەکان بە تەزکییەی تەزویرەوە دەنگی خۆیان هەر دەدەن بە پارتی.
دەشڵێت، “پێشتر خەڵک ناحەقی نەبوو بەرامبەر هەڵبژاردن سارد بێت، بەڵام ئەمڕۆ رۆژێکی نوێیە و هەست بە گڕ و تینێکی جیاواز دەکەم، دەنگی هاوڵاتییان ناخورێت، پارتی ناتوانێت ساختەکاری بکات”.
قوباد تاڵەبانی، ئەوەش دەڵێت، “یەکێتی بەخۆیدا چووەتەوە و کەموکورتییەکانی خۆی چاککردووە یەک دەنگ و یەک وتار و یەک ئاراستەیە یەک سەرۆکی هەیە کە بافڵ جەلال تاڵەبانییە توانیویەتی بوێرانە بەرامبەر پارتی بوەستێت و بڵێت بەستە چیتر ئەم ستەم و جیاوازییکردنە لەنێو شارەکان قبوڵناکەین”.
وتیشی، “سەرۆکی یەکێتی سەرجەم چین و توێژەکانی لەگەڵ حزبەکەی ئاشتکردووەتەوە”.
