نوسینگەی سەرۆک وەزیرانی عێراق راگەیەندراوێکی بڵاویکردەوە و ئاماژەی بەوەکردووە، سەرۆک وەزیران چەند بڕیارێکی لە بەرژەوەندیی هاوڵاتیانی لوبنانی لە عێراق دەرکردووە.
ئاماژە بەوەشکراوە، بە لەبەرچاوگرتنی ئەو هەلومەرجە سەختەی کە گەلی برای لوبنان پێیدا تێدەپەڕێت، وەک هاودەنگی و پشتیوانی عێراق و حکومەت و گەلەکەی، لەگەڵ برایانی لوبنان، محەمەد شیاع سودانی، سەرۆکوەزیران و فەرماندەی گشتیی هێزە چەکدارەکان چەند بڕیارێکی دەرکرد.
یەکەم: درێژکردنەوەی مۆڵەتی مانەوە بۆ هاوڵاتییانی لوبنانی کە لە عێراقن بۆ ماوەی سی رۆژ بەهۆی بارودۆخی جەنگی زۆرەملێوە.
دووەم: بەخشینی هاوڵاتییانی ئەو وڵاتە کە لە ئێستادا سەرپێچی یاسا دەکەن لەو سزایانەی بەهۆی خاڵی یەکەمەوە دەکەوێتە سەریان.
سێیەم: بەردەوام بوون لە پێدانی ڤیزای هاتنەناو عێراق بێ بەرامبەر بە هاوڵاتییانی لوبنانی کە خۆیان دەگەیەننە دەروازە سنوورییەکانی عێراق.
