بەڕێوەبەرایەتیی ئاسایشی ھەولێر دەستگیركردنی خاوەن و بەكارھێنەری گروپێكی راگەیاند و دەڵیت، “وێنە و ڤیدۆی نەشیاوی چەندین پیاو و ژنیان تۆماركردووە و لە بەرامبەر بڵاونەكردنەوەی بڕێكی زۆر پارەی وەرگرتووە”.
بەپێی راگەیەندراوێكی بەڕێوەبەرایەتیی ئاسایشی ھەولێر كە وێنەیەكی دەست تۆڕی میدیایی ئێستا كەوتووە و تێیدا هاتووە، دوای ئەوەی لەلایەن چەند ھاوڵاتییەك سكاڵا تۆماركرا لەسەر ھەژماری “دادەتیك تۆك”، كە ھەڕەشەی بڵاوكردنەوەی ڤیدۆی و وێنەی لە چەند كەسێك كردبوو، بە فەرمانی دادوەری لێكۆڵینەوەی ئاسایشی ھەولێر و لەڕێگی تیمی تەكنیكی و دوای ئەنجامدانی بەدواداچوونەكان، توانیان شوێن و ناسنامەی بەكارھێنەری ھەژماری “دادە تیك تۆك” ئاشكرابكەن و دەستگیری بكەن.
ئاماژەی بۆ ئەوەشكرد، لە لێكۆڵینەوەكاندا دەركەوتووە، كە ئەو تۆمەتبارە خاوەنی گروپی “مەلەفە زەخمەكان”ـە، لە تەلەگرام و خاوەنی ھەژماری “شۆخان”ـە لە سناپچات.
ئاسایشی ھەولێر ئاشكراشیكرد، لەبەر ئەوەی تۆمەتبارەكە كەسێكی شارەزا بووە لە بواری تەكنیكی و لە شێوازی گفتوگۆكردندا، توانیویەتی دەنگی خۆی بۆ ژن بگۆڕێت، وێنە و ڤیدۆی نەشیاوی چەندین پیاو و ژنی تۆماركردووە و لە بەرامبەر بڵاونەكردنەوەی وێنەكانیان بڕێكی زۆر پارەی وەرگرتووە.
