سەرۆكی یەكێتی لە پەیامێكدا بۆ یەكێتیی زانایان هیوادەخوازێت هەوڵی هەموولایەك لەپێناو خزمەتی گشتی و چەسپاندنی دادپەروەریدا بێت.
دەقی پەیامەكە:
بەڕێزان مامۆستایانی پایەبەرزی ئاینی
بەڕێزان لە یەکێتیی زانایانی ئاینی ئیسلامیی کوردستان
ساڵیادی دامەزراندنی یەكێتییەكەتان پیرۆزبێت و لەدڵەوە هیوای بەردەوامی و سەركەوتنی زیاترتان بۆ دەخوازم.
ئێمە بە رێز و پێزانینەوە لە رۆڵ و پێگەی بەرزی مامۆستایان و زانایانی ئاینی دەڕوانین، هەوڵەكانیان لەپێناو قووڵكردنەوەی پێكەوەژیان و گەشەپێدانی بیری ئاشتی و میانڕەوی بەرز دەنرخێنین.
پارێزگاریكردن لە بەها باڵا و پیرۆزەكانی ئیسلام ئەركی هەموومانە و هیوادارم هەوڵی هەموولایەكمان لەپێناو خزمەتی گشتی و چەسپاندنی دادپەروەریدا بێت.
بافڵ جەلال تاڵەبانی
سەرۆکی یەکێتیی نیشتمانیی کوردستان
