دووانەن و ساڵانە لەگەڵ خستنەبازاڕی ئایفۆنی نوێ ئەم جۆرە وێنەیە بڵاودەکەنەوە

حەسان عەزاوی و محەمەد عەزاوی، دوو برای دووانەی بە نەتەوە عەرەبن و پێكەوە لە سلێمانی کاری رۆژنامەوانی دەکەن. ساڵانە لەگەڵ خستنەبازاڕی ئایفۆنی نوێ بەشداری دەکەن و لەگەڵ نەوە جیاوازەکانی ئایفۆندا ئەم جۆرە وێنەیە دەگرن.

لە ساڵانی رابردوودا، وێنەکانی حەسان و محەمەد بە سۆشیاڵ میدیادا بڵاودەبووەوە و وەک نیشانەیەکی جیاوازی نێوان نەوە جیاوازەکانی ئایفۆن باسی لێوە دەکرا، کە دوو برا دوانەکە چەندێک جیاوازییان هەیە، نەوەکانی ئایفۆنیش هەر ئەوەندە.

حەسان عەزاوی ئەمڕۆ بە تۆڕی میدیایی ئێستای راگەیاند، نە خۆی و نە براکەی نەوە نوێیەکەی ئایفۆنیان نەکڕیووە کە ئایفۆن 16یە، بەڵكو تەنها وەک یادکردنەوەیەک بۆ ساڵانی رابردوو، کە وێنەکەیان گرتووە، ئەمساڵیش ئەو کارەیان کردووە.