بەڕێوەبەری خانەنشینیی پێشمەرگە لە سلێمانی رایدەگەیەنێت، ئامادەكارییمان بۆ هاوتاكردنی مووچەی خانەنشینانی سەربازیی لەگەڵ عێراق كردووە و چاوەڕوانی بڕیاری كۆتایی حكومەت و وەزارەتی دارایی هەرێم دەكەین.
عەزیز عەلی فەتاح، بەڕێوەبەری خانەنشینیی پێشمەرگە لە سلێمانی لە لێدوانێكدا بە تۆڕی میدیایی ئێستای راگەیاند، پێشتر بۆ هاوتاكردنی مووچەی خانەنشینانی سەربازی، لیستی مووچە و پسووڵەی بانك راكێشرابوو و سەرجەم ئامادەكارییەكانمان كردووە و چاوەڕوانی بڕیاری كۆتایی حكومەت و وەزارەتی دارایی بووین و بۆ هەر مانگێك بڕیاربدرێت بەزووترین كات كارەكان بەكۆتا دەهێندرێن.
جێی ئاماژە بۆ كردنە، بەپێی بڕیاری دادگای فیدراڵیی عێراق پێویستە مووچەی خانەنشینانی هەرێم هاوتای عێراق بكرێت و بۆ مووچەی مانگی تەمموز مووچەی خانەنشینانی شارستانیی هاوتای عێراق كرا.
