مەڵبەندی سێی هەولێری یەکێتیی نیشتمانیی کوردستان پەیامێکی بڵاوکردووەتەوە و دەڵێت، “سووکایەتیکردن بە مووچەخۆران هەموو سنوورێکی تێپەڕاندووە”.
ئاماژەی بەوەشکردووە، دوای دوو مانگ زیاتر، هێشتا مووچەخۆران مووچەیان وەرنەگرتووە، بێگومان فشارێکی زۆری نەبوونی و تێکچوونی بەرنامەی بژێوی ژیان لەلایەك و لە رووی دەروونیشەوە فشارێکی زۆری لەسەر کۆی خێزانەکان و تەنانەت جوڵەی بازاڕیش دروستکردووە، ناکرێت لایەنی پەیوەندیدار ئەوەندە خەم ساردبێت.
باس لەوەشدەکات، وەبیریان دێنینەوە کە ئێستا کاتی کردنەوەی دەرگای قوتابخانەکانە، هەموو خێزانەکان بەتایبەت مووچەخۆران، ژمارەیەك قوتابی و خوێندکاریان هەیە (بەتاڵبوونی ئامێرەکانی راکێشانی پارە)ش هەر وەکو ئەوەیە کەمووچە دواکەوتووە، یاخود دیسان پاشەوکەتی دەکەنەوە.
لە راگەیەندراوەکەی مەڵبەندی سێی هەولێردا هاتووە، لەدوێنی شەو و لەبەرەبەیانی ئەمڕۆش تا ئەم ساتەش، مووچەخۆران ریزیان بەستووە بۆ ئەوەی مووچەی مانگی حەوت رابکێشن، بەڵام ئامێرەکانی (هەژماری من) پێیان دەڵێت ببوورن پارەمان نییە !
دەشڵێت، “ئایا وەزارەتی دارایی و حکومەت، ئەم عەزاب و سزا دەروونیە چییە بەسەر موچەخۆراندا سەپاندووتانە؟؟؟
مەبەستتان چیە لەم هەموو سوکایەتی و ئازارە دەروونی و تووندوتیژیە داراییەی لەبەرامبەر موچەخۆران پەیڕەوی دەیکەن؟؟؟
ئەگەر پێتان وایە، لەم رێگەیەوە دەتوانن خەڵك سووك و ریسوا بکەن و کەسایەتی و نەفسیەتیان بشکێنن، دەبێت باش بزانن، خەڵکیش لە رۆژی 10/20 وەڵامی ئەم هەموو سوکایەتی و سزایەتان دەداتەوە”.
