ئەندامێكی لیژنەی دارایی لە ئەنجومەنی نوێنەرانی عێراق رایدەگەیەنێت، بڕیاری پێكهێنانی لیژنەیەك بۆ هاوتاكردنی مووچەی خانەنشینانی هەرێم لەگەڵ عێراق دراوە، بەڵام تائێستا هیچ رێكارێكی كارگێڕیی و ژمێریاری نەگیراوەتەبەر و بڕیاری دادگای فیدراڵیی عێراق هەیە كە مافیان پارێزراوە.
د. نەرمین مەعروف ئەندامی لیژنەی دارایی لە ئەنجومەنی نوێنەرانی عێراق لە لێدوانێكدا رایگەیاند، بەپێی بەدواداچوونەكانمان بڕیاری پێكهێنانی لیژنەیەك بۆ هاوتاكردنی مووچەی خانەنشینانی هەرێم لەگەڵ عێراق دراوە و لیژنەكە بە بڕیاری حكومەتی عێراق بووە و ئەندامانی لیژنەكە دەستنیشانكراون كە راسپاردەكانیان ئامادەبكەن بۆ هاوتاكردنی مووچەی خانەنشینان.
وتیشی، ” تائێستا هیچ رێكارێكی كارگێڕیی و ژمێریاری نەگیراوەتەبەر، بەڵام بڕیاری دادگای فیدراڵیی عێراق هەیە كە دەبێت مووچەی خانەنشینان هاوتا بكرێت و مافەكانیان پارێزراوە”.
