وەزیری دادی عێراق بە سەردانێکی رەسمی چووە شاری کەرکوک و رایگەیاند، حکومەتی خۆجێیی کەرکوک، حکومەتی هەموو پێکهاتەکان دەبێت، ئەنجامدانی هەڵبژاردن لە کەرکوک دەستکەوتێکی گەورە و گرنگە چونکە چەندین ساڵە هەڵبژاردن لە کەرکوک ئەنجامنەدرابوو.
خالید شوانی، وەزیری دادی عێراق دووپاتیشیکردەوە، نابێت خەمساردی لە پڕۆژەکان بکرێت و هەموو هەوڵەکان بەو ئاڕاستەیەن کەرکوک بکرێتە شارێکی نمونەیی لە عێراق و هەموو کەرتەکانی شارەکە بەرەو پێش ببرێت و هەموو ئەو کێشە و گرفتانەی لە شارەکە بوونیان هەبێت چارەسەر بکرێن.
وەزیری داد لە میانەی سەردانەکەیدا بۆ شاری کەرکوک لەگەڵ پارێزگار و یەکە ئیدارییەکانی شارەکە کۆبووەوە و رایگەیاند نامانەوێت ململانێکان بەردەوام بن و ئەوەی بۆ کەرکوک گرنگە خزمەتکردنە و باسی لەوەشکرد، دەیانەوێت چارەسەری هەموو کێشە یاساییەکانی کەرکوک بکەن.
لای خۆشیەوە، رێبوار تەها، پارێزگاری کەرکوک رایگەیاند، لەکۆبوونەوەیاندا لەگەڵ وەزیری دادی عێراق، هەماهەنگی و هاوکاری هاوبەش لە نێوان وەزارەتی داد و ئیدارەی کەرکوک و فەرمانگەکانی دادوەری لە کەرکوک تاوتوێکرا بەمەبەستی کارکردن بۆ خزمەتکردنی هاوڵاتییانی کەرکوک و لابردنی ئاستەنگەکانی بەردەم باشترکردنی دۆخی خزمەتگوزاری و کاریگەرییەکانی لەسەر پەرەپێدان و پارێزگاریکردن و دەستەبەرکردنی مافی هاوڵاتییان.
