هەڤاڵ ئەبوبەکر، پارێزگاری سلێمانی ، سەرپەرشتیی کۆبوونەوەی لیژنەی ئارامیی پارێزگای سلێمانی بۆ هەڵبژاردنەکانی پەرلەمانی کوردستانی کرد و جەخت لەسەر فەراهەمکردنی کەشێکی لەبار بۆ هەموولایەک کرایەوە.
کۆبوونەوەکە لە دیوانی پارێزگای سلێمانی بەڕێووەچووە، لە کۆبوونەوەکەدا رێنمایی و رێکاری پێویست بەپێی بڕیار و رێنماییەکانی لیژنەی باڵای ئارامیی هەرێمی کوردستان بۆ هەڵبژاردنەکانی پەرلەمانی کوردستان و بەپێی یاساکانی کۆمسیۆنی هەڵبژاردنەکان دیاریکران.
هەر لە کۆبوونەوەکەدا، جەخت لەسەر فەراهەمکردنی کەشێكی لەبار و یەکسان و هاوسەنگ بۆ هەموو کاندید و قەوارە و هاوپەیمانێتییەکان کرایەوە و داوا لە هەموولایەک کرا، پابەندی بڕیار و رێنماییەکانی کۆمسیۆن و لیژنەی باڵای ئارامیی هەرێمی کوردستان و لیژنەی ئارامیی پارێزگای سلێمانی بن.
