ئەنجوومەنی وەزیران کاتەکانی دەوامی دامودەزگا رەسمییەکانی بەغدادی پایتەختی دیاری کرد، بەشێک لە فەرمانگەکان دەوامیان لە کاتژمێر 7:00 دەستپێدەکات.
لە راگەیەندراوێکدا، ئەمیندارییەتیی ئەنجومەنی وەزیرانی عێراق کاتەکانی دەوامی لە فەرمانگە و دامەزراوە رەسمییەکانی بەغدادی پایتەختی عێراق دیاریکرد.
بەشێک لە فەرمانگە و دامەزراوە رەسمییەکان، لە ناوچەی سەوز و وەزارەتەکانی (کاروباری دەرەوە، پلاندانان، کشتوکاڵ، سەرچاوەکانی ئاو، ژینگە، کۆچ و کۆچبەران، پەیوەندییەکان، وەرزش و لاوان، رۆشنبیری، پیشەسازی و کانزاکان، بانکی ناوەندیی عێراق، دیوانی چاودێری دارایی فیدراڵی و دەسەڵاتی فڕۆکەوانی مەدەنی) لە کاتژمێر 7:00ی بەیانی دەستپێدەکات و کاتژمێر 2:00ی پاشنیوەڕۆ کۆتایی دێت.
هاوکات، بەشێکی دیکەییان کە هەرسێ سەرۆکایەتیی و وەزارەتەکانی (ناوخۆ، بەرگری، تەندروستی، دارایی، کارەبا، داد، کار و کاروباری کۆمەڵایەتی، وەزارەتی پەروەردە و سەرجەم خوێندنگە و پەیمانگاکانی پەیوەست بەوەوە) لە کاتژمێر 8:00ی بەیانی دەستپێدەکات و کاتژمێر 3:00ی دوای نیوەڕۆ کۆتایی دێت.
دەوامی رەسمی بۆ وەزارەتەکانی (خوێندنی باڵا و توێژینەوەی زانستی، گواستنەوە، بازرگانی، بیناسازی و نیشتەجێکردن، شارەوانی و کارە گشتیەکان، نەوت، فەرمانگەی ئەوقافی شیعە و سوننە، دامەزراوەی شەهیدان و زیندانیانی سیاسی، دەستەی باڵای حەج و عومرە). لە کاتژمێر 9:00ی بەیانی بۆ 4:00ی دوای نیوەڕۆ دەبێت.
دەوامی رەسمی بۆ سەرجەم زانکۆ و پەیمانگا حکومی و ئەهلییەکان لە کاتژمێر 10:00ی بەیانی دەستپێدەکات، بە لەبەرچاوگرتنی دەستکاریکردنی پشووی هەفتانە بۆ کۆلێژ و بەشەکان بۆ بەدەستهێنانی گۆڕانکاری لە دەوام لە رۆژانی هەفتەدا.
