وەزارەتی گواستنەوەی عێراق ئەنجامدانی هەنگاوێكی دیكەی “رێگای گەشەپێدان” رادەگەیەنێت.
وەزارەتەكە لە راگەیەندراوێكدا لە زاری كۆمپانیای گشتیی هێڵی ئاسنینی عێراق زیادبوونی رێژەی ئەنجامدانی نەخشەی بنەڕەتیی پرۆژەی رێگەی گەشەپێدانی ئاشكراكرد و رایگەیاند، نەخشەی سەرەتایی هێڵی ئاسنین تەواوكراوە، روپێوی تۆبۆگرافی و پشكنینی خاكی پرۆژەكەش بە رێژەی 100% تەواوكراوە.
ئاماژەشیدا، رێژەی ئەنجامدانی نەخشە بنەڕەتییەكانی رێگای خێرا گەیشتووەتە 75%، نەخشەكان لە مانگی ئەیلولی داهاتوودا تەواو دەكرێن.
وەزارەتی گواستنەوە روونیشیكردەوە، رێڕەوی رێگای خێرا درێژییەكەی 1131 كیلۆمەترە، درێژیی هێڵی ئاسنینیش 1201 كیلۆمەترە.
رێگای گەشەپێدان بڕیارە لەماوەی چوار ساڵدا لە نێوان عێراق و توركیادا دروستبكرێت، بریتییە لە هێڵێكی ئاسنینی ئابوری بۆ گواستنەوەی كاڵا و شمەك و، رێگایەكی خێرای هاتوچۆكردنی ئۆتۆمبێل و بارهەڵگر.
پێشتر هیشام ركابی، راوێژكاری محەمەد شیاع سودانی سەرۆك وەزیرانی عێراق بۆ تۆڕی میدیایی ئێستا رایگەیاند، “بودجەی تەرخانكراو بۆ پڕۆژەكە 17 ملیار دۆلارە، 10.5 ملیار دۆلاری بۆ راكێشانی هێڵی ئاسنینە و 6.5 ملیار دۆلاریش بۆ دروستكردنی رێگای خێرای هاتوچۆكردنی ئۆتۆمبێل و بارهەڵگرە”.
ئەو هێڵی شەمەندەفەری پڕۆژەی “رێگای گەشەپێدان” لەخۆیدەگرێت، درێژییەكەی 1200 كیلۆمەترە و بە 10 پارێزگای عێراقدا گوزەردەكات و شەمەندەفەرەكانی كارەبایی دەبن و بە تەكنەلۆژیای نوێ كاردەكەن.
بەپێی وەزارەتی گواستنەوەی عێراق، پڕۆژەكە هەموو پێداویستی و تایبەتمەندییەكی سەردەم لەخۆدەگرێت و ئامانج لە جێبەجێكردنی، بەستنەوەی بەندەری فاوە بە توركیا و دواتریش ئەوروپاوە، بەوەش هاتوچۆكردنی شەمەندەفەر، ئۆتۆمبێل و بارهەڵگر لە بەسڕەوە تا توركیا دەستەبەردەكات و، عێراق وڵاتانی دەوروبەر و وڵاتانی كەنداو بە بازاڕەكانی ئەوروپاوە دەبەستێتەوە.
