دوای مانەوەی بۆ ماوەی 29 رۆژ لە نەخۆشخانە هاوڵاتییەکی خەڵکی سنووری ناحیەی ژاراوە گیانیلەدەستدا و کەسوکارەی دەڵێن بەهۆی خواردنەوەی گیادەرمانییەک بووە.
بەڕێوەبەرایەتیی پۆلیسی راپەڕین بڵاویکردەوە، هاوڵاتییەک کە پیشەی کاسب بووە و لەدایکبووی ساڵی 1972 بووە، لە ناحیەی ژاراوە بەهۆی ناجێگیریی تەندروستییەوە گەیاندراوەتە نەخۆشخانەی گشتیی قەڵادزێ لە 14ی 7ی ئەمساڵدا.
کەسوکارەکەی رایانگەیاندووە، ناوبراو باری دەروونی ناجێگیربووە و دەرمانی گیایی فریزو گەڵاپانی خواردووەتەوە و بەو هۆیەوە دۆخی تەندروستی تێکچووە و دواتر هەمان رۆژ بەهۆی خراپی دۆخی تەندروستیەوە بەڕێکراوە بۆ نەخۆشخانەی شاری سلێمانی.
ئاماژە بەوەشکراوە، دوانیوەڕۆی دوێنێ سێشەممە، هاوڵاتییەکە دوای مانەوەی بۆ 29 رۆژ لە نەخۆشخانە، بەهۆی کاریگەریی دەرمانەکەوە گیانیلەدەستدا و پۆلیسی راپەڕین دەڵێت، پەڕاوی لێکۆڵینەوەیان بۆ رووداوەکە کردووەتەوە.
