شێخ جەعفەر شێخ مستەفا، لێپرسراوی ئەنجومەنی پاراستنی بەرژەوەندییە باڵاكانی یەكێتیی نیشتمانیی كوردستان و ژمارەیەكی بەرچاو لە ئەندامانی مەكتەبی سیاسی و سەركردایەتی، لە فڕۆكەخانەی نێودەوڵەتیی سلێمانی پێشوازییان لە بافڵ جەلال تاڵەبانی، سەرۆكی یەكێتیی نیشتمانیی كوردستان كرد دوای ئەو سەركەوتنە گەورەیەی كورد و یەكێتی لە وەرگرتنەوەی پارێزگاری كەركوك بەدەستیانهێنا.
لەمیانی پێشوازییەكەدا، سوپاس و پێزانین ئاڕاستەی سەرۆكی یەكێتی كرا كە سەرباری ململانێ و بەربەستەكانی ماوەی رابردوو، توانی بە هەوڵە سیاسی و دیپلۆماسییەكانی خۆی ئەم پرسە نیشتمانییە لە بەرژەوەندیی كورد، تەبایی و پێكەوەژیانی كەركوك كۆتایی پێبهێنێت.
لە بەرامبەردا سەرۆك بافڵ جەلال تاڵەبانی سوپاسی ئامادەبووانی كرد و رایگەیاند، “ئەم هەنگاوە مێژووییە سەركەوتنی ئیرادەی كەركوكییەكان بوو و ئیدارەی نوێی پارێزگاكەش بێگومان رەنگدانەوەی ئیرادەی ئەوان دەبێت”.
وتیشی، “یەكێتیی نیشتمانیی كوردستان درێژە بە سیاسەتی حەكیمانەی سەرۆك مام جەلال دەدات، دوور لە جیاوازیی نەتەوەیی و ئایینی، خزمەتی هەموولایەك دەكات و هەوڵەكانی لەپێناو خزمەتی گشتی و یەكڕیزیی نێوان هێز و لایەنەكاندا دەبێت”.
