وەزیرانی دەرەوەی گروپی حەوت داوایان لە وڵاتانی رۆژهەڵاتی ناوەڕاست کرد خۆیان لە هەر هەنگاوێک کە ببێتە هۆی زیاتر پەرەسەندنی گرژی و ئاڵۆزییەکانی ناوچەکە بەدوور بگرن.
لە بەیاننامەیەکدا وەزیرانی دەرەوەی گروپی حەوت ئاماژەیان بەوەکرد، ”نیگەرانی قووڵی خۆمان دەردەبڕین سەبارەت بە پەرەسەندنی ئاستی گرژییەکان لە رۆژهەڵاتی ناوەڕاست، کە هەڕەشەی هەڵگیرسانی ململانێیەکی گەورەتر لە ناوچەکەدا دەکات و جارێکی دیکە داوا لە هەموو لایەنە پەیوەندیدارەکان دەکەین خۆیان بەدوور بگرن لە پەرەسەندنی دۆخەکە”.
ئەوەشیان خستووەتەڕوو، ”هیچ وڵاتێک سوودمەند نابێت لە پەرەسەندنی زیاتری گرژی و ئاڵۆزییەکانی رۆژهەڵاتی ناوەڕاست، دەبێت بەردەوام بین لە کارکردن بۆ رێگریکردن لە توندوتیژی و تۆڵەسەندنەوە”.
