شاڵاو هیدایەت، شارەزای کەشناسی دەڵێت، “هەولێر پیسترین شاری هەموو کوردستانە، نەک هەر لەباشووری کوردستان بەڵکو لە هەرسێ پارچەی کوردستانی تریش پیسترینە و پێنجەم پیسترین شاری جیهانە”.
ئەو کەشناسە ئاماژەی بەوەکردووە، شاری هەولێر کە پایتەختی هەرێمی کوردستانە یەکێکە لەو شارانەی کە ژینگە و هەوای تێیدا زۆر پیسە ئەویش بەهۆی زۆری و بەرزی گازە گەرم و پیسکەرەکان تێیدا و تایبەت گازی دوانەئۆکسیدی کاربۆن کە زۆر بەرزە.
باسی لەوەشکردووە، هەموو سووتانێک دەبێتە هۆی بەرهەمهێنانی ئەم گازە کە گازێکی بێ رەنگ و گەرم و خنکێنەرە، سەرەڕای ئەوەی ئەم گازە و سەرجەم گازه گەرمەکانی تر پێویستن لە بەرگە هەوادا چونکە نەبونایه زەوی یەکپارچە دەبووە سەهۆڵبەندان، بەڵام بۆ سەرجەم درەخت و زیندەوەران و مرۆڤ و ژیانی ئاسایی پێویستە لەئاستێکی ستاندارد و بارێکی هاوسەنگیدابن و لە سەدەی رابردووەوە هەر لەگەڵ دەستپێکی شۆڕشی پیشەسازیەوە هەنگاو بەهەنگاو تائێستا رێژەی ئەو گازانە زیادیانکردووە و بوونەتە پیسبوون و گەرمبوونی زەوی کە بڵاوترینیان دوانەئۆکسیدی کاربۆن و گۆگرد و نایترۆجین و میسان و ئەوانەی دیکەن.
زۆر زیادبوونی ئەم گازانە لە بەرگەهەوای زەویدا بووەتە هۆی ئەوەی هەنگاو بەهەنگاو و ساڵ لەدوای پلەکانی گەرما بەرزبێتەوە و بەمەش قەتیسبوونی گەرمای لێکەوتووەتەوە و لەئەنجامدا بووەته هۆی روودانی دیاردەیەک ئەویش گۆڕانی کەشوهەوایە کە تادێت کارەساتی سروشتی زیاتر لەگەڵ خۆی دێنێت بێگومان هەرێم و عێراقیش پشکی شێریان بەردەکەوێت لەم گۆڕانکاریانە و پێویستە لەداهاتوودا هەموو ئامادەکارییەک و خۆگونجاندێک بکرێت بۆ ئەم گۆڕانکاریانە.
