پۆلیسی سلێمانی رایدەگەیەنێت، لەسەر دۆسیەی کوشتنی هاوڵاتییەک دوو تۆمەتبار دەستگیركران كە دایك و كچن.
بەڕێوەبەرایەتیی پۆلیسی پارێزگای سلێمانی رایگەیاند، دوای ئەوەی شەوی رابردوو کەسێک بە سەردان دەچێتە ماڵێک لە گەڕەکی کانێسکان، دواتر لە ماڵەکەدا لەگەڵ دوو کەسی دیكەدا دەبێتە شەڕ و دەمەقاڵێ، لە ئەنجامدا کەسەکە بەچەقۆ بە سەختی برینداردەکرێت و دوای گەیاندنی بۆ نەخۆشخانە، بەهۆی سەختی برینەکەیەوە گیانلەدەستدەدات و، تۆمەتباران بۆ شوێنێکی نادیار هەڵدێن.
ئاماژەی بەوەشدا، دوای گەیشتنی هێزەکانی پۆلیس بۆ شوێنی رووداوەکە و ئەنجامدانی کەشف و هێڵکاریی، لێکۆڵینەوەکانی پۆلیس دەستیانپێکرد، سەرەنجام و دوای وەرگرتنی بڕیاری دادوەر، توانرا لە ماوەیەکی کەمدا دوو تۆمەتبار لەلایەن مەفرەزەکانی بەشی پۆلیسی نەهێشتنی تاوانەوە بدۆزرێنەوە و دەستگیربکرێن.
پۆلیسی سلێمانی روونیشیكردەوە، هەردوو تۆمەتبار (ن.ع.م. – أ.ج.م.) کە دایک و کچن، بە بڕیاری دادوەر و بەپێی ماددەی 405 لە یاسای سزادان راگیراون و لێکۆڵینەوەکان بەردەوامە.
