رۆژی 22ی تەمموزی هەموو ساڵێک وەک رۆژی جیهانی مێشک دیاریکراوە، ئەم رۆژە بۆ دووپاتکردنەوەی مانەوەی مێشکی مرۆڤە بە تەندروستییەکی باشتر و بە ئامانجی ئەوەی هۆشداریی کۆمەڵایەتی لەبارەی دۆخە دەمارییەکانی مێشکی مرۆڤەوە زیادبکرێت.
پسپۆڕانی تەندروستی بۆ باشترکردنی بیرەوەریی مێشکی مرۆڤ، چەند خاڵێک بە گرنگ دادەنێن و ئەمانەن:
یەکەم: چالاکی فیزیکی، یاخود جەستەیی، رۆشتنی خوێن بۆ مێشک زیاددەکات، بیرەوەری باشتردەکات و پێشنیاری پێنج رۆژ لە هەفتەیەدا دەکرێت بۆ هەر کەسێک 30 خولەک وەرزش بکات.
دووەم: خۆراک، خواردنی ژەمی دەوڵەمەند بە میوە، سەوزە و تۆوەکان، پڕۆتینی پێویست بۆ مێشک دابین دەکات، وەک ئۆمیگا سێ، لە چەرەساتەکان و ماسی و تۆوەکاندا بوونی هەیە.
سێیەم: ئەنجامدانی یارییەکانی پەیوەست بە بیرکردنەوە، وەک پەزڵەکان لەگەڵ خوێندنەوە، فێربوونی شتێکی نوێ، ژەنینی موزیک.
چوارەم: خەوی رێک، شەوانە حەوت بۆ نۆ سەعات بخەون، ئەوە تەندروستی مێشک بەرەوپێشدەبات.
پێنجەم: کەمکردنەوەی سترێسی رۆژانە، وەک ئەنجامدانی یۆگا، مێدیتەیشن، هەناسەی قوڵ هەڵمژین و راگرتنی و پاشان دانەوەی هەناسەکە و بەسەربردنی کات لەناو سروشتدا.
شەشەم: پەیوەندی کۆمەڵایەتی، تێکەڵبوونی کۆمەڵگە و کەسانی نزیکت، شتێکی زۆر باشە، چونکە کاریگەری دەبێت لەسەر زیادبوونی بیرەوەریت، یەکێکی دیکەش لە شتەکان بەشداربوونە لە کۆمەڵە و گروپی خوێندنەوە و ئەنجامدانی کاری خۆبەخشی.
حەوتەم: سەپڵیمێنت، تەواوکاری خۆراکی، وەک جینگۆ بایلۆبا، جینسینگ، ڤیتامینی B، ئەمانە هەمووی کاریگەری باشیان لەسەر بیرەوەری دەبێت، بەڵام هیچ تەواوکار و دەرمانێک بەبێ راوێژکردن بە پزیشک مەخۆن.
