وەزارەتی شارەوانی و گەشتوگوزاری هەرێم ئاشكرایكردووە، لە گرێبەستە نوێیەكانی خاوێنكردنەوەی دەیان هەزار یەكەی نیشتەجێبوون “ساڵانە 7 ملیۆن دۆلار بۆ خەزێنەی حكومەت دەگەڕێنینەوە”.
لە ڕاگەیەندراوێكدا ئەمڕۆ سێشەممە 12ی كانونی دووەم، وەزارەتی شارەوانی و گەشتوگوزاری هەرێم ڕایگەیاندووە، “لە گرێبەستە نوێیەكانی خاوێنكردنەوەدا، دەیان هەزار یەكەی نیشتەجێبوون و شوێنی بازرگانی زیاد كران”.
ئەوەشی ئاشكراكردووە، “وەزارەتی شارەوانی پێداچوونەوەی بە گرێبەستی كۆمپانیاكانی خاوێنكردنەوە لە سنووری سەرۆكایەتیی شارەوانیی هەولێر و بەڕێوبەرایەتیی گشتیی شارەوانییەكانی هەولێر كرد، بەهۆیەوە ساڵانە بڕی 7 ملیۆن دۆلار بۆ خەزێنەی حكومەت دەگەڕێنێتەوە”.
وەزارەتی شارەوانی ئەوەشی خستوەتەڕوو، “خاوێنكردنەوەی هەردوو شەقامی 120 مەتری و 150 مەتریی هەولێر و دوو زۆنی فراوانیش لە سنووری شارەوانییەكانی بنەسڵاوە و دارەتوو، كەسنەزان و بەحركە، شاوێس و پیرزین، سێبیران و كانی قڕژاڵە لە گرێبەستە نوێكانی ئێستا زیادكراون”.
“وێڕای زیادكردنی زۆنەكان، ژمارە و كوالێتی ئامێرەكانیش بەرزكراونەتەوە و چەندین قەلاب و شۆفڵ و پیكابیش دابینكراون، كە دوای تەواوبوونی ماوەی گرێبەستەكان، خاوەندارێتی ئەو ئامێرانە بۆ وەزارەتی شارەوانی و گەشتوگوزار دەگەڕێتەوە”.
