بەڕێوەبەری راگەیاندنی پەرلەمانی كوردستان رایدەگەیەنێت، چاوەڕواندەكرێت لە سەرەتای هەفتەی داهاتوو مووچەی پەرلەمانی کوردستان لەلایەن بەغداوە رەوانەبكرێت و ئەندامێكی ئەنجومەنی نوێنەرانی عێراقیش دەڵێت، “مووچەی وەزارەتی كارەبا گرفتی نەماوە و لە سەرەتای هەفتەی داهاتوو دەنێردرێت”.
سامان ئەحمەد، بەڕێوەبەری راگەیاندنی پەرلەمانی كوردستان لە لێدوانێكدا بە تۆڕی میدیایی ئێستای راگەیاند، دیوانی چاودێریی دارایی عێراق وردبینییان كردووە و هیچ گرفتێك لە لیستەكاندا نەبووە، پێشتریش دیوانی چاودێریی دارایی هەرێم سەردانیان كردوون و هیچ گرفتێك لە لیستی مووچەی مووچەخۆرانی پەرلەمانی كوردستاندا نەبووە.
وتیشی، ” ناردنی مووچەی پەرلەمانی كوردستان پەیوەستە بە تەواوكردنی رێكارە كارگێڕییەكان و چاوەڕواندەكرێت لە سەرەتای هەفتەی داهاتوودا مووچەی مووچەخۆرانی پەرلەمان بنێردرێت”.
لەبارەی ناردنی مووچەی وەزارەتی كارەباوە، غەریب ئەحمەد ئەندامی ئەنجومەنی نوێنەرانی عێراق لە لێدوانێكدا بە تۆڕی میدیایی ئێستای راگەیاند، چەند تێبینییەك لە لیستی وەزارەتی كارەبا هەبووە و وردبینی كراوە و چارەسەركراون و چاوەڕواندەكرێت سەرەتای هەفتەی داهاتوو مووچەی وەزارەتی كارەبا لەلایەن بەغداوە بنێردرێت”.
