وەزیری دارایی هەرێم و راوێژکاری سودانی کۆبوونەوە.
وەزارەتی دارایی و ئابوریی هەرێم لە راگەیەندراوێکدا بڵاویکردەوە، ئەمڕۆ ئاوات شێخ جەناب وەزیری دارایی و ئابوری پێشوازی لە هەیسەم حەسەنی، راوێژکاری سەرۆک وەزیرانی عێراق و سەرۆکی لیژنەی یەکخستنی ئیدارەی دارایی لە نێوان حکومەتی هەرێم و حکومەتی فیدراڵ کرد.
بەپێی راگەیەندراوەکە، لە دیدارێکدا گفتوگۆ لەسەر هەنگاوەکانی کارەکانی لیژنەی یەکخستنی ئیدارەدانی دارایی و ژمێریاری لە نێوان وەزارەت و دامەزراوەکانی حکومەتی هەرێم و حکومەتی فیدراڵ کراو وەزیری دارایی ئامادەیی وەزارەت و بەڕێوبەرایەتییە گشتییەکانی بۆ سەرخستنی کارەکانی لیژنەکە و یەکخستنی رێکارە دارایی و ژمێریارییەکان دووپاتکردەوە.
ئاماژە بەوەش دەکات، راوێژکاری سەرۆک وەزیرانی عێراق، رایگەیاند هەوڵەکانیان چڕ دەکەنەوە تا کۆتایی ئەم مانگە کارەکانی لیژنەی یەکخستنی ئیدارەدانی دارایی تەواو بکەن.
لە راگەیەندراوەکەدا هاتووە، بڕیارە چەندین خولی هاوبەش لەنێوان هەردوو وەزارەتی دارایی هەرێمی کوردستان و حکومەتی فیدراڵی بۆ فەرمانبەرانی ژمێریاری تایبەت بە یەکخستنی ئیدارەدانی دارایی و ژمێریاری بکرێتەوە.
