وەفدێكی حكومەتی عێراق سەردانی هەرێمی كوردستانیان كرد و بڕیاری پێكهێنانی تیمێك درا بۆ رێكخستنەوەی رێكارە كارگێڕییەكان و دروستكردنی سیستمێكی دارایی گونجاوی هاوبەش لە نێوان هەرێم و بەغداد.
ئومێد سەباح سەرۆكی دیوانی ئەنجومەنی وەزیرانی هەرێم رایگەیاند، رۆژی پێنجشەممە، لەگەڵ وەفدێكی حكومەتی عێراق لە هەولێر كۆبوونەوە كە تایبەتبوون بە رێكخستنەوەی رێككارە كارگێڕی و داراییەكان لە نێوان هەرێم و بەغداد.
راشیگەیاند، لە كۆبوونەوەكەدا هەریەكە لە د. ئامانج رەحیم، سكرتێری ئەنجومەنی وەزیران و د. عەبدولحەكیم خەسرۆ، سەرۆكی فەرمانگەی هەماهەنگی و بەدواداچوون ئامادەیبوون، باس لە چۆنییەتیی رێكخستنەوەی رێككارە كارگێڕییەكان و سیستمی دارایی لە نێوان هەرێم و بەغداد كرا بە شێوەیەك كە هاوشێوەی یەكتری بن و گونجاوبن لەگەڵ یەكتر.
دەشڵێت، “بۆ ئەم مەبەستە بڕیاردرا بە پێكهێنانی تیمێك، ئەم تیمەش كار لەسەر رێكخستنەوەی رێككارە كارگێڕییەكان و دروستكردنی سیستمێكی دارایی گونجاو و هاوبەش دەكات لە نێوان هەرێم و بەغداد كە ئەمەش دەبێتە بناغەیەكی بەهێز بۆ ئەوەی لە داهاتوودا گرفتە كارگێڕیی و داراییەكان بگەن بە چارەسەر”.
