وەفدێكی بانكی ناوەندیی عێراق سەردانی هەرێمی كوردستانیان كرد و هەنگاوەكانی پێكهێنانی بانكی نیشتمانیان تاوتوێكرد و وەزارەتی دارایی هەرێم دەڵێت، “بەدەستبەكاربوونی بانكەكە فەرمانبەران و هاوڵاتیان لە چەندین پێشینە و قەرز و خزمەتگوزاریی دارایی و بانكی سوودمەنددەبن و سەرجەم بانكە حكومییەكانی وەزارەتی دارایی لە ژێر چەتری بانكی نیشتمان رێكدەخرێنەوە”.
بەپێی راگەیەندراوێكی وەزارەتی دارایی هەرێم كە وێنەیەكی دەست تۆڕی میدیایی ئێستا كەوتووە و تێیدا هاتووە، رۆژی پێنجشەممە وەفدێكی بانكی ناوەندیی عێراقی سەردانی وەزارەتی دارایی و ئابورییان كرد و لە دیدارێكدا گفتوگۆ لە سەر دوایین هەنگاوەكانی پێكهێنانی بانكی نیشتمان كرا و هەردوولا جەختیان لەسەر هەماهەنگیی دوولایەنە بۆ سەرخستنی پڕۆسەی پێكهێنانی بانكەكەیان كردەوە لە نزیكترین كاتدا و ڕۆڵی بانكەكەیان لە پڕۆسەی پێشخستنی بواری دارایی و ئابووری لە هەرێمی كوردستان و عێراق بەرزنرخاند.
هەر لە راگەیەندراوەكەدا هاتووە، بانكی نیشتمان كە سەرمایەكەی زیاتر لە 250 ملیار دینارە، كۆتایی ساڵی رابردوو لەلایەن بانكی ناوەندیی عێراقەوە مۆڵەتی رەسمی پێدرا، بەدەست بەكاربونی بانكەكەش فەرمانبەران و هاولاتیان لە چەندین پێشینە و قەرز و خزمەتگوزاریی دارایی و بانكی سوودمەند دەبن و سەرجەم بانكە حكومییەكانی وەزارەتی دارایی لە ژێر چەتری بانكی نیشتمان رێكدەخرێنەوە.
