وەزارەتی پەروەردەی ھەرێم پەیمانگەیەکی پێنج ساڵی لە پارێزگای سلێمانی دەکاتەوە بە ناوی پەیمانگای پیشەیی سلێمانی و خوێندکاران دەتوانن بۆ ئەمساڵی خوێندن فۆڕمی وەرگیران لەو پەیمانگایە پڕبکەنەوە.
وەزارەتی پەروەردە بڵاویکردەوە، خوێندن لە پەیمانگای پیشەیی سلێمانی بە زمانی ئینگلیزییە و لە بەشەکانی، ژمێریاری، گوشتوگوزار، دیزاین، کۆمپیوتەر پێکدێت و خوێندکار لە هەر بەشێک وەربگیرێت مافی گۆڕینی بەشەکەی نابێت.
ئاماژەی بەوەشکرد، بۆ ئەمساڵی خوێندن تەنها 60 خوێندکار لە پەیمانگاکە وەردەگیرێن بۆ هەر بەشێک 15 خوێندکار، ساڵی یەکەمی خوێندن تەنها بۆ فێربوونی زمانی ئینگلیزییە و پرۆگرامەکانی خوێندن لە ساڵی دووەمەوە دەستپێدەکات.
ئاشکراشیکرد، خوێندکارى دەرچووى پۆلى نۆى بنەڕەتى دەبێ سەردانى خوێندنگەى خۆى بکات بۆ وەرگرتنى ووشەى بەکارهێنەر (یوزەر نێم username) و ووشەى تێپەڕ (پاسوۆرد password) بۆئەوەى بتوانێت فۆرمى پێشکەشکردن پڕبکاتەوە.
لە راگەیەندراوەکەی وەزارەتی پەروەردەدا هاتووە، لە ئەمڕۆوە تا کۆتایی ئەم مانگە دەتوانن فۆڕمی وەرگرتن لێرەوە پڕبکەنەوە.
