سەرۆکی لیژنەی پیشەسازی لە ژووری بازرگانیی سلێمانی رایگەیاند، بلۆک وزە ناگەڕێنێتەوە ئەمەش هۆکاری ئەوەیە زۆرینەی ماڵەکان لە وەرزی هاویندا زۆر گەرم دەبن و پێویستیان بە فێنککەرەوە دەبێت، بۆیە داوا دەکەم لە ئەمڕۆوە کارگەی بلۆکەکان دابخەن.
ئارام بابان سەرۆکی لیژنەی پیشەسازی لە ژووری بازرگانیی سلێمانی لە لێدوانێکی رۆژنامەوانیدا رایگەیاند، کەشوهەوای وڵاتی ئێمە بە شێوەیەکە هاوینان پلەی گەرما دەچێتە سەروو 40 پلەی سەدی، لە زستانیشدا پلەی گەرما دێتە خوار سفری سەدی، خانووەکانی ئێمە زۆرینەی لە بلۆک دروستکراون کە سروشتی وایە وزە ناگەڕێنێتەوە.
ئاماژەی بەوەشکرد، “من داوا دەکەم لە ئەمڕۆوە کارگەی بلۆکەکان دابخرێن یان بکرێن بە کارگەی خشت یان ماددەی دابڕێنەر (عەزل)، چونکە خشت 50% ی وزە دەگەڕێنێتەوە”.
ئاشکراشیکرد، ئەوەی ئێستا دەیبینین ئەنجامی بەکارهێنانی بلۆکە لە دروستکردنی خانووەکاندا وەک دەبینین مووچەخۆرێک 30% ی مووچەکەی بدات بە فێنککەرەوە لە هاویندا و گەرمکەرەوە لە زستاندا.
