بەرپرسێکی وەزارەتی ئەوقاف و کاروباری ئایینیی هەرێم رایدەگەیەنێت، 20ی ئەم مانگە گەڕانەوەی یەکەم کاروانی حاجییانی هەرێم لە سعودیەوە بە رێگای وشکانی دەستپێدەکات.
نەبەز ئیسماعیل، وتەبێژی وەزارەتی ئەوقاف و کاروباری ئایینیی هەرێمی کوردستان بە تۆڕی میدیایی ئێستای راگەیاند، ”رۆژی پێنجشەممە کە دەکاتە 20ی ئەم مانگە گەڕانەوەی کاروانی حاجییان بە رێگای وشکانی دەستپێدەکات و 22ی ئەم مانگە دەگەنەوە هەرێمی کوردستان”.
سەبارەت بەو حاجییانەی بەڕێگای ئاسمانی گەشتەکەیان کردووە نەبەز ئیسماعیل دەڵێت، ”25ی ئەم مانگە بە رێگای ئاسمانی گەڕانەوەی حاجییان لە سعودیەوە دەستپێدەکات و گەڕانەوەشیان نزیکەی هەفتەیەک دەخایەنێت”.
پێشتر دەستەی گشتیی ئاماری سعودیە بڵاویکردبووەوە، ئەمساڵ ملیۆنێک و 833 هەزار و 164 کەس بەشداری لە رێوڕەسمەکانی حەج دەکەن و لەو ژمارەیەش بەپێی ئامارێکی وەزارەتی ئەوقافی هەرێمی کوردستان چوار هەزار و 685 کەس لە هەرێمەوە فەریزەی حەجیان کردووە.
