وەزارەتی دەرەوەی ئەمریكا، گروپی چەکداریی ئەنساروڵا ئەوفیای عێراقی و حەیدەر غەڕاوی، کە ئەمینداری گشتیی گروپەکەیە، خستە ناو لیستی تیرۆرەوە.
وەزارەتی دەرەوەی ئەمریكا ئاماژەی بەوەکردووە، ئەم گروپە، میلیشایەكی هاوپەیمانی ئێرانە و بەشێكە لە گروپی بەرهەڵستكارانی ئیسلامی لە عێراق.
وەزارەتەکە ئاماژە بەوەشدەکات، ئەم گروپە ئەندامی بەرەیەکی چەند گروپین کە بەرپرسیارێتی خۆیان لە دەیان هێرشی ئەم دواییەی دژی کارمەندانی سەربازی ئەمریکا لە عێراق و سوریا راگەیاندووە.
ئەوەش دووپاتکراوەتەوە، ئەمریکا پێداگرە لەسەر لاوازكردن و پەكخستنی توانای ئەو گروپانەی لەلایەن ئێرانەوە پشتیوانی دەكرێن بۆ ئەنجامدانی هێرشی تیرۆریستی.
