پۆلیسی گەرمیان دەستگیرکردنی سێ کەس بە تۆمەتی دزینی 19 بتڵی غاز رادەگەیەنێت.
بەڕێوەبەرایەتیی پۆلیسی گەرمیان لە راگەیەندراوێکدا بڵاویکردەوە، دوای سکاڵای چەند هاوڵاتییەکی دانیشتووی گەڕەکی شۆڕش و گەڕەکی حەمرین لە قەزای کەلار کە لەلایەن کەسانی نەناسراوەوە چەندین جار بتڵی غازی ماڵەکانیان دزراوە، بەشی پۆلیسی نەهێشتنی تاوانی گەرمیان دوای لێکۆڵینەوە و بەدواداچوون توانیان سێ تۆمەتبار دەستگیربکەن.
لە راگەیەندراوەکەدا هاتووە، ئەو کەسانەی دەستگیرکراون، دوای لێکۆڵینەوە دانیان بەتاوانەکەدا ناوە کە لەهەردوو گەڕەکی ناوبراو 19 بتڵ غازیان دزیوە و دواتر فرۆشتویانە، ئێستا بە بڕیاری دادوەر و بەپێی مادەی 446 بەندکراون ولێکۆڵینەوە لەگەڵیان بەردەوامە.
