بەگوێرەی راگەیەندراوی وەزارەتی دارایی هەرێم، ئەمڕۆ دەست بە دابەشکردنی مووچەی مانگی ئایار دەکرێت و ئەو شوێنانەی ئەمڕۆ مووچەی مانگی ئایار وەردەگرن بریتیدەبن لە: خانەنشینانی مەدەنی، کەسوکاری شەهیدان و ئەنفالکراون، خاوەن پێداویستییە تایبەتەکان و زیندانیانی سیاسی.
دەستکردن بە دابەشکردنی مووچە دوای گەیشتنی بڕی 107 ملیار دینار لەلایەن وەزارەتی دارایی عێراقی فیدراڵەوە بۆ سەر هەژماری بانکی وەزارەتی دارایی و ئابوری هەرێمی کوردستان بوو بە گوێرەی قسەی وەزارەتی دارایی هەرێمی کوردستان.
وەزارەتی دارایی هەرێمی جەختی کردەوە، دوای گەیشتنی تەمویلی وەزارەت و دامودەزگاکانی تر لەلایەن وەزارەتی دارایی حکومەتی فیدراڵەوە، راستەوخۆ خشتەی مووچەی ئەو دام و دەزگایانەش رابگەیەندرێت.
ئەمەش لەکاتێکدایە، نزیکەی 65 رۆژە مووچەی هێزە ئەمنییەکانی هەرێمی کوردستان دابەشنەکراوە بەهۆی نەناردنی لیستی ناوی هێزە ئەمنییەکان بۆ وەزارەتی دارایی عێراق و بە گوێرەی زانیارییەکان، بەشێک لە هێزەکان لە جێگەی ناو بە کۆد لیستی مووچەکانیان رەوانەی بەغداد دەکرێت و تەنها ئەو شوێنانەی کە زۆر هەستیارن، لە جێگەی ناو بە کۆد مووچەکانیان وەردەگرن و دوای وردبینی لە ناوەکان لەماوەیەکی کورتدا، پارەی پێویست بۆ مووچەکانیان رەوانەی هەرێم دەکرێت.
