بە ئامادەبوونی بەرپرسانی ئەمنیی باڵا كۆبوونەوەیەك تایبەت بە ئاڵوگۆڕی زانیاری و هەماهەنگیی هەواڵگری لەنێوان هەرێم و بەغداد بەڕێوەچوو.
ئەمڕۆ سێشەممە 4ی حوزەیران کۆبوونەوەی هاوبەشی ئەنجومەنی ئاسایشی هەرێمی کوردستان و ئەنجومەنی هەواڵگریی نیشتمانیی عێراق بەڕێوەچوو.
كۆبوونەوەكە بە ئامادەبوونی جەلال شێخ ناجی سەرۆکی ئاژانسی پاراستن و زانیاری/ زانیاریی هەرێم، هیوا ئەحمەد سەرۆکی دەزگای ئاسایشی هەرێم و رێبەر ئەحمەد وەزیری ناوخۆی هەرێم لە هەولێر بەڕێوەچوو و تیایدا ئاڵوگۆڕی زانیاری و هەماهەنگیی هەواڵگری و ئاڵنگارییە ئەمنییەکان تاوتوێکران.
هەر لە کۆبوونەوەکەدا هەردوولا تەئکیدیان لە هاریکاریی زیاتری نێوان دەزگا ئەمنییەکان و یەکخستنی هەوڵە هەواڵگرییەکان کردەوە لەپێناو سەقامگیریی زیاتری ئاسایش و ئارامی لە وڵاتدا.
هەنگاوەکانی رووبەڕووبوونەوەی پاشماوەکانی تیرۆر و یاساشکێنان، لابردنی بەربەستەکانی بەردەم کێشەکان و دۆسییە هاوبەشەکان، تەوەرێکی تری کۆبوونەوەکە بوو کە هەڵسەنگاندنی بۆ کرا و لەسەر بنەمای یاسا بەرکارەکان و بەرژەوەندیی نیشتمانیی بڕیاری پێویستیان لەبارەوە درا.
